Edi Rama pritet që në fundjavë të largojë shumicën e sekretarëve të PS-së. Duke hequr kështu të gjithë njerëzit që mund të jenë pjesë e hetimeve apo që janë të tillë.
Kështu mësohet se Ilir Beqja dhe Alfred Peza do të zëvendësohen nga dy deputetë të tjerë.
Ndërkohë që, Bashkim Fino do të largohet nga Sekretari për Sipërmarrjen dhe Diasporën për t’u zëvendësuar me Stefan Çipën.
Edi Rama dhe fshesa në PS
Janë enigmë totale emrat që priten të emërohen, por burime në selinë rozë bënë të ditur se do të ketë suprizë, të emëruarit do të jenë totalisht emra të rinj dhe të ardhur nga struktura të rretheve, të cilët kanë pasur sukses në zgjedhjet e 15 qershorit.
Largimi i Beqajt siç duket bëhet ngaqi si ministër i Shëndetësisë ka pasur disa padi ndaj tij prej opozitës në Prokurori.
Dhe ka mundësi që organi i akuzës të hapë një hetim zyrtar për të.
Ndërkohë Alfred peza, i cili nuk është deputet, është ende në procesin në lidhje me auzën e pastrimit dhe fshehjes së parave.
Kjo, pas publikimit të një transaksioni ku Peza me rreth 1 milionë dollar bleu aksionet e një banke në Shqipëri.
Largimi i Saimir Tahirit
Por më e rëndësishmja për Ramën duket se është vendosja e ekuilibrave pas largimit të Saimir Tahirit dhe mbushjen e boshllëkut të tij.
Largimi i Saimir Tahirit nga funksionet drejtuese në PS, ka hapur një shteg të ri konkurrence dhe beteje të brendshme për të zënë pozicionet që ish-ministri i zotëronte në parti.
Tani padyshim që njeriu kryesor dhe refereues në PS-në e kryeqytetet mbetet kryebashkiaku i kryeqytetit, Erion Veliaj, i cili ka konsoliduar edhe më shumë pozitat brenda formacionit politik.
Deri sot është vërejtur një përplasje lobingjesh brenda socialistëve të Tiranës. Një herë avanconin njerëzit e Veliajt e një herë ato të Saimir Tahirit.
Kongresi i shkuar dhe zgjedhja e anëtarëve të Asamblesë Kombëtare shënoi një duel të ashpër ndërmjet dy palëve kontentente.
Ndërsa deri në zgjedhjet vendore të vitit 2015, punësimet dhe marrëdhëniet me militantët e Tiranës i mbante ekskluzivisht Saimir Tahiri, pas zgjedhjes së Erion Veliajt gjërat ndryshuan.
Duke sjellë një dyzimi të armatës së përkrahësve socialistë.
Veliaj me rritjen e fuqisë së tij potenciale dhe reputacionit publik, shtoi gjithnjë e më shumë influencën brenda PS-së së Tiranës.
Tahiri – Veliaj
Kjo gjë çoi që në zgjedhjet e fundit Erion Veliaj të ishte realisht lideri politik i Qarkut të Tiranës.
Rama, jo pa qëllim, në kryeqytet nuk caktoi një lider liste, ndryshe nga qarqet e tjera.
Kreu i qeverisë gjeti një zgjidhje paksa “të çuditshme”. Ku renditja në listë nuk ishte sipas prioritetit për t’u zgjedhur deputet, por sipas zonave që ata mbulonin.
Kështu e para u vendos Elona Gjebrea që mbulonte Njësinë Bashkiake nr 1. Ndërsa Saimir Tahiri që ishte kryetar partie u vendos i 9-ti meqë mbulonte Kombinatin.
Por realisht brenda strukturave të larta dihej se kreu real i fushatës në Tiranë ishte Erion Veliaj. E kjo nuk u tha njësive politike të PS-së që drejtonin fushatën në bazë.
Shumë pak vetë e dinin skemën se Saimir Tahiri nuk ishte drejtuesi politik i Tiranës. E gjithë kjo, pasi publikisht ish-ministri fliste si lider grupi.
E kjo situatë krijoi komplikacione, pasi mjaft prej militantëve të kryeqytetit morën premtime e lidhën marrëveshje të pashkruara për punësime dhe sistemime.
Pra me një fjalë u krijua një zinxhir i gjatë lobimi që me këputjen e tij nga Edi Rama ka krijuar një amulli, një paqartësi.
Lufta për territore
Por padyshim edhe një boshllëk, jo i vogël, që nëse lihet pa vënë dorë mund të shndërrohet në një territor “pjellor” për një “luftë për territore”.
Por nga kush? Shumë mbështesin tezën se Erion Veliaj tashmë është një “cezar”.
Por kjo nuk përjashton mundësinë e influencave të Saimir Tahirit, i cili edhe pse i larguar nuk se i janë këputur të gjitha fijet.
Nga nga do t’i luajë këto fije ish-ministri?
Apo do t’i duhet Edi Ramës të jetë vetë në “Konferencën e Tiranës”?
Pikërisht këto janë zhvillimet e pritshme, të cilat do të ndodhin së shpejti brenda e mazhorancës.
Pikërisht në momentin e parë që do të nisë ndarja e posteve të mëdhenj në administratë….
Veliaj, sa ka mbështetës që natyrisht janë shtuar më shumë edhe në këtë situatë, ka edhe njerëz që janë jashtë “livadhit të tij politik”.
Por nga lista aktuale e Tiranës, nuk duket se ka një mundësi rivaliteti. Apo ndonjë ambicje prej ndonjë politikani që duket është përzgjedhur me kujdes nga Edi Rama.
Sa e qetë, pikërisht kjo gjendje pa rivalë mund të prodhojë një lëvizje “jashtë sistemit”. Një lëvizje që ndodh menjëherë kur ka pakënaqësi prej ndarjes së pushtetit.
Koha më opurtune e kësaj prove natyrisht do të jenë zgjedhjet vendore të 2019-s. Atëherë kur dhe njerëzit do të kërkojnë lidhjen e “kontratave të reja”…
Për Lajm Shqip
Ylli PATA
