Dalin detajet e reja: ja kush ishin 7 ‘konsujt’ që drejtonin ikjen në SHBA… Rrjeti i 7 organizatave që u kapën dje njiheshin prej kohësh nga ana e policisë. Ajo që Xhafaj dhe Veriu shpallën si sukses është hetuar prej disa vitesh.
Hetimi ka nisur fillimisht nga prokurori Anton Martini në muajin mars të 2017. Pas transferimit të tij në Shkodër, dosja ju besua prokurorit Eugen Beci.
Organizata ishte e ndarë në 7 grupe, 7 ‘konsujt’, që vepronte me linja të ndryshme dhe me çmime të ndryshme sipas destinacionit, pra SHBA, Britaninë e Madhe dhe Kanada.
Krerët e këtyre grupeve janë Ardian Corri, që vepronte në Lezhë, i dënuar më parë nga drejtësia shqiptare për trafikim me skaf të 44 klandestinëve.
Nik Bushi që vepronte në Shkodër, ky person është dënuar në SHBA për akuzën e trafikut të klandestionëve.
Zaim Hysenbelliu në Tiranë, i arrestuar nga prokuroria në vitin 2014.
Një emër tjetër është Nikolin Priska që dyshohet se ka qenë anëtar i grupit “Go-West”. Grupi falsifikonte viza amerikane dhe 29 të shteteve të tjera.
Një tjetër drejtues është Fuat Zaimi.
Pikërisht këta persona vepronin paralelisht me konsullatat dhe drejtonin ikjen në SHBA, Kanada dhe Angli.
Në mënyrë të paligjshme lëshonin viza falso për shuma nga 7 mijë dollarë deri në 25 mijë dollarë.
Aktiviteti i disa prej këtyre grupeve kriminale shtrihet që nga viti 2006, duke dërguar persona në SHBA dhe Angli.
Ardian Corri është njeriu kryesor që drejtonte një prej gjashtë grupeve kriminale që trafikonin klandestinë. Corri njihet nga policia dhe prokuroria si person me të kaluar kriminale. Në mars të 2012 është dënuar nga Gjykata e Lartë me 4.8 vite burg për akuzën e trafikimit me skaf të 44 klandestinëve nga grykëderdhja e lumit Mat në drejtim të Italisë.
Për këtë veprimtari kriminale, Corri, në prill të 2009 u dënua nga Apeli i Krimeve të Rënda me 8 vjet burgim.
Ky dënim është ulur në mënyrë të ndjeshme nga Gjykata e Lartë e cila vendosi ta dënojë përfundimisht Corrin me 4.8 vite burgim. Mësohet se pjesë e grupit të Ardian Corrit, ka qenë dhe Lek Frroku.
Pavarësisht këtij dënimi, Corri sërish nuk ka hequr dorë, duke vijuar të trafikojë klandestinë.
Ai është prezantuar përpara qytetarëve të interesuar për të udhëtuar në SHBA, Angli dhe Kanada, se kishte njohje të forta me njerëz në disa vende, ai do u mundësonte këtyre personave udhëtimin në SHBA.
Sipas prokurorisë grupi i Ardian Corrit ka qenë me linja transporti të rregullta. Ai ishte një nga grupet që në pjesën më të madhe të rasteve garantonin futjen e personave në SHBA. Corri disponon një hotel dhe bar-restorant në plazhin e Shëngjinit, në Lezhë.
Për Lajm-Shqip
Ylli Pata
