Rajoni jugor mbetet më problematik për shkak të reshjeve të dëborës. Dëbora krijon problem dhe bllokime në 10 njësi të rajonit jugor.
Dëbora që ka përfshirë rajonin jugor ka krijuar problem e bllokime në qarkullim në 10 njësi administrative të rajonit.
Vështirësi qarkullimi ka në të gjitha zonat malore të Gjirokastrës, Tepelenës dhe Përmetit. Burime të policisë dhe prefekturës bëjnë të ditur se janë bllokuar nga reshjet e dëborës disa akse të rrugëve në zonat e mbuluara nga dëbora.
Në Gjirokastër raportohen të bllokuara rrugët: Kolonjë-Golem, Gjirokastër-Zagorie, Libohovë-Pogon dhe Kardhiq-Fushbardhë, ne vende ku trashësia është mbi 60cm.
Në Tepelenë: janë të paqarkullueshme akset: që lidhin qendrën me fshatrat Lekdush, Progonat, Gusmar, Rexhinë, Nivicë dhe Matohasanaj. Këto akse mund të qarkullohen vetëm me zinxhirë, ndërkohë që raportohen ndërprerje të energjisë elektrike.
Qytetet e Tepelenës dhe Memaliajt janë përfshirë e mbuluar nga reshjet e dëborës. Vështirësi në qarkullim janë krijuar në disa fshatra të njësisë administrative Luftinjë dhe Buz. Bora në këto zona ka arritur deri në 10 cm.
Në Përmet mësohet se mbetet e bllokuar zona e Frashërit. Aksi Pagri-Frashër është i mbuluar nga dëbora me trashësi deri 30cm. Ndërkohë që në aksi kombëtar Përmet-Tri Urat është i rrezikshëm për kalim për shkak të rrëshqitjeve të mëparshëme.
Në të 7 bashkitë e qarkut ka patur ndërprerje të energjisë elektrike, lëvizjes së nxënësve dhe ngrohjes në shkollat 9-vjeçare.
Për Lajm-Shqip
Engjëll Serjani
01.03.2018
