Në zgjedhjet e vitit 2009, kur garonte në një koalicion më vete përballë me PS dhe PD, forca politike e drejtuar nga Ilir Meta mori 73678 vota. Ndërkaq, në 23 qershor, numri i votave është rritur në mënyrë të pabesueshme në 179951, çka i justifikon të 16 karriget e deputetëve, 4 herë më shumë se në 2009
Krejt ndryshe nga sa mund të mendohej, pas katër vitesh në pushtet, Lëvizja Socialiste për Integrim i ka shtuar 106.273 vota ose thënë ndryshe është rritur me 1.4 herë në raport me vitin 2009. Ndryshe nga kjo përqindje krahasimore votash, me numër deputetësh forca që themeloi dhe drejton prej 6 shtatorit 2004 Ilir Meta, mori katër herë më shumë se në 2009, pra 16.
Sipas të dhënave statistikore, mund të shihet qartë se në zgjedhjet kuvendare të vitit 2009, kur garonte në një koalicion më vete përballë Partisë Socialiste dhe Partisë Demokratike, for
ca politike e drejtuar nga Ilir Meta mundi të marrë 73,678 vota.
Ndërkaq, në zgjedhjet e fundit kuvendare të 23 Qershorit numri i votave është rritur në mënyrë të pabesueshme në 179951, çka i justifikon të 16 karriget e deputetëve që kjo forcë politike merr në Kuvendin e ri që mblidhet në shtator.
Përbën interes fakti se rritja e Lëvizjes Socialiste për Integrim nuk është e lokalizuar, por e shtrirë në të 12 qarqet e vendit. Pika më e lartë në këtë tregues është padyshim ajo e Qarkut të Beratit ku së fundi LSI mori 21651 vota ndërsa katër vite më parë kishte vetëm 8844.
Në Qarkun e Dibrës rritja e LSI është me 6258 vota plus ose për efekt krahasimor 2.6 herë më shumë. Një rritje më e ulët konstatohet në Qarkun e Durrësit ku janë shtuar vetëm dy mijë vota. Një tregues që ka shumë gjasa të ketë qenë i ndikuar nga fakti se në këtë Qark garonte Lefter Koka, i cili mund të ketë toleruar me qëllim që deputet të dilte edhe Agron Duka që garonte për siglën e Partisë Republikane.
Rritje me 2.6 herë vihet re edhe në Qarkun e Elbasanit çka u përkthye në produkt konkret me mandate deputetësh për LSI-në çka nuk kishte ndodhur katër vite më parë. Pavarësisht largimit të Dritan Priftit dhe faktit se ai mundi të marrë zyrtarisht mbi 6 mijë vota, LSI në Qarkun e Fierit është rritur me 9 mijë vota të tjera krahasuar me katër vite më parë.
Në Qarkun e Gjirokastrës rritja është shumë domethënëse pasi nëse në 2009 LSI kishte vetëm 1005 vota, aktualisht ka arritur në 11460 të tilla. Koefiçienti i rritjes në Qarkun e Korçës shkon në 3.1 herë pasi nga 4572 numri i votave ka arritur në 14553.
Duket se me sukses ka qenë afrimi i kryebashkiakut të Kukësit tek LSI dhe largimi i tij nga Partia Demokratike. Kjo forcë nga 1214 vota ka mundur të rritet në 5650 vota.
Garimi i Monika Kryemadhit (bashkëshortja e zotit Meta) në Lezhë është përkthyer me votë mbi tre herë më shumë për Lëvizjen Socialiste për Integrim në këtë qark. Rritje është konstatuar edhe në Qarkun e Shkodrës me 10 mijë vota krahasuar me zgjedhjet e kaluara. Nëse në Qarkun e Tiranës LSI është dyfishuar në Qarkun e Vlorës numri i votave është rritur tre herë.
Pikëpyetja më e madhe që shtrohet sot për sot është se nga kanë ardhur këto vota të Lëvizjes Socialiste për Integrim pas katër vitesh qeverisje me Partinë Demokratike. Edhe në këtë rast ekziston një logjikë shpjeguese nisur nga realiteti politik dhe analiza e ftohtë e shifrave.
Me shumë gjasa fluksi i parë i votave vjen nga vetë “shtrati” i kësaj partie. Lëvizja Socialiste për Integrim e ka patur të lehtë të ruajë numrin prej 73 mijë votash që e kishte në vitin 2009 pa qenë në pushtet. Një tendencë logjike do të ishte ndoshta shtimi i këtyre votave nga 73 deri në rreth 100 mijë për shkak të kalimit në qeverisje. Ajo çka mbetet për tu justifikuar është rritja me rreth 80 mijë vota të tjera që kjo forcë nuk i ka patur më herët.
Bashkimi i Lëvizjes Socialiste për Integrim me Partinë Socialiste krijoi bindjen se matematikisht e majta ishte në avantazh ndaj të djathtës dhe shanset për kalimin e saj në qeverisje u rritën. Në këtë formë, drejt LSI-së së Ilir Metës mund të jenë drejtuar ata që mund të cilësohen “të pakënaqur” nga lidershipi i Partisë Socialiste. Duke e ditur se e majta do të vinte në pushtet, e në kushtet kur nuk kishin pëlqim për lidershipin socialist, ata mund të kenë preferuar t’i bashkohen me votë Lëvizjes Socialiste për Integrim duke përbërë kështu fluksin e dytë të votave.
Bashkëqeverisja katërvjeçare me Partinë Demokratike, në mënyrë të pashmangshme i ka krijuar Lëvizjes Socialiste për Integrim dhe drejtuesve të saj kontakte e lidhje me firmat dhe bizneset e djathta, të cilat kanë qenë të preferuarat e qeverisjes tetëvjeçare. Kjo lloj marrëdhënie dhe perspektiva e zhvillimit të bizneseve të djathta edhe në qeverisjen e majtë mund të kenë krijuar fluksin e tretë të votave në drejtim të Lëvizjes Socialiste për Integrim.
Fluksi i katërt mbetet padyshim administrata publike në nivel qendror dhe lokal. Të bindur, të paktën “matematikisht” për mundësinë e ardhjes në pushtet të së majtës si aleancë e Partisë Socialiste me Lëvizjen Socialiste për Integrim, shumë nëpunës të djathtë kanë zgjedhur të votojnë LSI-në për të ruajtur vendin e punës pavarësisht rotacionit të pushtetit.
Se sa do të arrijë Lëvizja Socialiste për Integrim të ruajë këto shifra votash, do të mund të kuptohet që në zgjedhjet e ardhshme për pushtetin lokal në vitin 2015 e më tutje në zgjedhjet kuvendare të vitit 2017. Shumë variabla do të ndërhyjnë deri në atë kohë me ndikim të drejtpërdrejtë tek votat e LSI-së e mes tyre padyshim do të jetë mënyra e të qeverisurit, zhvillimet brenda Partisë Demokratike e mbi të gjitha edhe raportet mes Partisë Socialiste dhe partisë së drejtuar nga Ilir Meta.
Votat e LSI në rang vendi
2009 zgjedhjet kuvendare – 73678 vota
2013 zgjedhjet kuvendare – 179951 vota
QARKU BERAT
Zgjedhjet kuvendare 2013 – 21651 vota
Zgjedhjet kuvendare 2009 – 8844 vota
QARKU DIBER
Zgjedhjet kuvendare 2013 – 10032 vota
Zgjedhjet kuvendare 2009 – 3774 vota
QARKU DURRËS
Zgjedhjet kuvendare 2013 – 11605 vota
Zgjedhjet kuvendare 2009 – 9655 vota
QARKU ELBASAN
Zgjedhjet kuvendare 2013 – 18484 vota
Zgjedhjet kuvendare 2009 – 7016 vota
QARKU FIER
Zgjedhjet kuvendare 2013 – 19436 vota
Zgjedhjet kuvendare 2009 – 10857 vota
QARKU GJIROKASTËR
Zgjedhjet kuvendare 2013 – 11460 vota
Zgjedhjet kuvendare 2009 – 1005 vota
QARKU KORÇË
Zgjedhjet kuvendare 2013 – 14553 vota
Zgjedhjet kuvendare 2009 – 4572 vota
QARKU KUKËS
Zgjedhjet kuvendare 2013 – 5650 vota
Zgjedhjet kuvendare 2009 – 1214 vota
QARKU LEZHË
Zgjedhjet kuvendare 2013 – 8655 vota
Zgjedhjet kuvendare 2009 – 2566 vota
QARKU SHKODËR
Zgjedhjet kuvendare 2013 – 12772 vota
Zgjedhjet kuvendare 2009 – 2813 vota
QARKU TIRANE
Zgjedhjet kuvendare 2013 – 35082 vota
Zgjedhjet kuvendare 2009 – 17552 vota
QARKU VLORË
Zgjedhjet kuvendare 2013 – 10571 vota
Zgjedhjet kuvendare 2009 – 3810 vota
18.07.2013
Burimi: Gazeta Tema
