Chelsea dhe Manchester Unitedi kanë zhvilluar një sfidë mbresëlënëse të vlefshme për League Cup. Blutë kanë arritur të hakmerren në Stamford Bridge duke fituar me rezultat 5-4.
Pas një fillimi të baraspeshuar të ndeshjes, mbrojtja vendase bëri një gabim fatal. Portieri Cech pasoi në afërsi te Romeu, të cilit ia mori topin Anderson dhe pasoi te Ryan Giggs. Mesfushori veteran heshti tifozët vendas në minutën e 22.
Nuk kaluan shumë minuta dhe arbitri akordoi penalti në favor të Bluve. David Luiz ishte i saktë për t’i barazuar shifrat.
I njëjti futbollist ishte fajtor për golin e dytë të United. Luiz e humbi topin në mesfushë, Anderson e gjeti për mrekulli Javier ‘Chicharito’ Hernandezin, i cili e ktheu epërsinë e Djajve të Kuq në minutën e 43 dhe ky ishte rezultati i pjesës së parë.
Futbollistët me fanellat e kaltra e filluan furishëm pjesën e dytë duke e barazuar serish rezultatin. Një harkim nga këndi të Matas e priti në zonë Gary Cahill që me kokë goditi në portë. Rafael e nxori topin, por pasi kishte kaluar vijën fatale.
Mirëpo, miqtë nuk lejuan që të zgjaste gëzimi i vendasve. Një bashkëpunim i bukur i Nanit dhe Anderson, bëri që anësori portugez ta rikthente epërsinë e United në minutën e 59 të takimit.
Në vazhdim, Blutë e kërkuan me ngulm golin që së paku ta dërgonin ndeshjen në shtesë. Angazhimi maksimal i vendasve u shpagua kur Ramires u ndal në mënyrë të gabuar në zonë. Eden Hazard e shënoi golin që dërgonte sfidën në shtesë.
Paraqitjen e përkushtuar e lojtarëve vendas e konfirmoi Daniel Sturridge, i cili shënoi golin e epërsisë në minutën e 97 për herë të parë për Blutë në këtë ndeshje të stërzgjatur.
Dhe për eliminimin e sigurt të Manchester Unitedit nga Kupa e Ligës u përkujdes Ramires.
Ndërkohë që në fund të shtesës, miqtë realizuan edhe një herë me anë të Ryan Giggs nga penaltia.
01.11.2012
Burimi: Balkanweb
