BERZH-Banka Europiane për Rindërtim dhe Zhvillim ka korrigjuar në ulje parashikimet për rritjen ekonomike të Shqipërisë. Në raportin e sapopublikuar për ekonomitë e rajonit, BERZH vlerëson se rritja ekonomike do të zbresë këtë vit në 1.5 për qind nga 1.9 për qind që kishte parashikuar në tre muaj më parë.
Në dokument shkruhet se ekonomia shqiptare u ngadalësua ndjeshëm vitin e kaluar, kur rritja e prodhimit ra në 1.6 për qind, ndonëse theksohet se sërish kjo shifër është më e larta në rajon përjashtuar Kosovën. Sipas BERZH-it, ngadalësimi i fortë i rritjes së prodhimit vjen në një kohë kur qeveria dhe Banka e Shqipërisë nuk kanë më hapësira për të stimuluar ekonominë, për shkak të borxhit të lartë dhe zbritjes në minimumin historik të normave të interesit.
Nga ana tjetër, banka vëren se sektori bankar në Shqipëri përballet me një nivel të lartë të kredive të këqija dhe mbetet i ekspozuar ndaj goditjeve të jashtme. Raporti i detajuar i BERZH-it nënvizon se gjithë rajoni i Europës Juglindore po përballet me vështirësi të thella ekonomike, për shkak të krizës së eurozonës. Në këtë pikë, ekspertët e bankës sugjerojnë se tashmë vendet e Ballkanit duhet të mbështeten më shumë në burimet e veta dhe duhet të ndërmarrin një sërë reformash të brendshme ekonomike për të mos lejuar thellimin e krizës.
Sakaq, ish-ministri i Financave, tani kandidat i pavarur për deputet në Qarkun e Vlorës, Arben Malaj, paralajmëron se Shqipëria ka hyrë në një krizë të thellë buxhetore, që po rrëzon ekonominë e vendit. “Deficiti buxhetor dhe borxhi publik po rriten çdo ditë. Kjo është maja e ajsbergut, pasi qeveria vazhdon të rrisë borxhet e papaguara ndaj biznesit, mbledhja e taksave është përkeqësuar dhe ambienti i biznesit është rënduar. Kjo ka vrarë rritjen ekonomike, pa të cilën nuk ka ulje të papunësisë dhe ulje të varfërisë. Situata buxhetore pas zgjedhjeve do të jetë akoma më e rëndë. Asnjë institucion financiar nuk do t’i ofrojë mbështetjen vendit tonë, n.q.s. nuk bëhen reformat në ekonomi, në sistemin taksa shpenzime, të cilat do të synojnë të rrisin punësimin”, tha Malaj. Në një konferencë për shtyp nga Kryesia e Kuvendit, zoti Malaj tha se Shqipëria po shkon drejt një marrëveshjeje të detyruar shpëtimi me institucionet donatore dhe ky skenar, sipas tij, ka kosto jo të vogla.
“Fondi Monetar Ndërkombëtar, Banka Botërore, Bashkimi Europian, si dhe çdo institucion tjetër financiar bazuar edhe në eksperiencën personale, do t’i vënë kushte jo të lehta vendit tonë, përpara se të japin mbështetje financiare për projekte zhvillimi që rrisin punësimin dhe rritjen ekonomike”, tha Malaj.
Ish-kreu i Financave mendon se ka një opsion të ri, se si Shqipëria mund të zbusë kostot e kësaj krize, por kjo kërkon më së pari një konsensus të gjerë politik.
“Ky opsion kërkon të reduktojmë çdo krizë politike gjatë dhe pas zgjedhjeve, kërkon të mos vonohet krijimi i qeverisë së re, kërkon që të jetë gati para zgjedhjeve një draft i reformave, për të cilat të gjitha partitë politike duhet të jenë dakord. Kërkon të ulet agresiviteti elektoral, të jenë sa më realiste premtimet për politika ulje taksash apo për rritje disa herë të shpenzimeve buxhetore”, tha Malaj.
16.05.2013
Burimi: Gazeta Shqip
