Lulzim Basha kryen një manovër për të kthyer në parti një pjesë të të larguarve të një viti më parë. Kështu, Basha rikthen Topallin e Meksin, por jo Patozin e Boden.
Basha rikthen Topallin e Meksin. Nuk bën të njëjtën gjë për Patozin e Boden.
Pa i përmendur me emër, por duke përdorur ndryshimet në statut, Basha rikthen kritiken e tij të madhe. Jozefina Topalli në Këshillin Kombëtar dhe sipas gjasave javën e shkuar e fut në kryesinë e re. Sipas ndryshimeve statutore, të gjithë ata që kanë pasur poste të larta në shtet si President, Kryetar Kuvendi dhe Kryeministra, bëhen pjesë e Këshillit Kombëtar në mënyrë automatike pa pasur nevojë që të zgjidhen. Propozimi në fakt ka ardhur nga Ervin Kulluri, një pjesëtar i kundërshtarëve të Bashës. Por është përkrahur menjëherë nga kryetari i PD-së. Madje nuk e ka futur as në votim, por ka kaluar unanimisht.
Sipas këtij ndryshimi: Bujar Nishani, Sali Berisha, Aleksandër Meksi dhe Jozefina Topalli janë katërshja që janë anëtarë të përjetshëm në “parlamentin” e Partisë Demokratike. Kjo sepse Bamir Topi, që ka qenë president nga PD, është larguar nga kjo forcë. Ndërsa ish-kryetari i Kuvendit Pjetër Arbnori nuk jeton më.
Futja e nenit për ish-krerët e shtetit.
Futja e nenit për ish-krerët e shtetit nuk është gjë e re në statutet e partive. Këtë e vendosi Edi Rama në Partinë Socialiste në vitin 2009, kur sanksionoi “Këshillin e të Urtëve”, si institucion konsultativ dhe pjesëmarrjen në Asamblenë Kombëtare.
Ndryshimet statutore do t’i përcillen për miratim Kuvendit Kombëtar të PD pas një jave. Ai mblidhet në datat 28 dhe 29 prill.
Në mbledhjen e djeshme të Këshillit Kombëtar të PD-së, ka qenë prezent nga “vip”-at vetëm ish-ministri i Mbrojtjes Arben Imami, i cili u largua demonstrativisht, pasi nuk u pranua neni që sanksionon dorëheqjen e kryetarit të PD-së nëse humb zgjedhjet. Kjo pikë nuk u vendos dhe sipas Edi Palokës, ajo është një klauzolë morale dhe nuk vendoset në asnjë dokument. Imami tha:
Partia vijon të mbetet monokratike. Propozimet jo vetëm nuk merren parasysh, por më e keqja është që nuk lejohen diskutimet. Nuk është një ditë e bukur kjo për PD-në.
Ndërkaq, Edi Paloka deklaroi se megjithatë në statut është vendosur klauzola se kur shkarkohet kryetari. Ai tha:
Çdo nen u votua në këshillin kombëtar. U propozuan disa variante. Qoftë për dorëheqjen ose për kufizim mandati, dorëheqja është vullnetare. Ndërsa shkarkimi është i përcaktuar në statut. Propozimi tjetër ishte për kryetarin. U dhanë ide për shkarkimin e tij, por nuk u votua se i binte që PD të ishte gjithë kohën në votime.
Në mbledhjen e djeshme nuk ishte prezent as Ridvan Bode, as Astrit Patozi e as Besnik Mustafaj. Sipas gjasave ata i kanë “larë” duart me PD-në dhe janë drejt formimit të një partie të re të djathtë.
Për lajm-shqip:
Ylli Pata
