Mëngjesi i 8 qershorit rezultoi fatal për 19- vjeçaren Xhuljeta Çuni, e cila u qëllua me armë nga ish- i dashuri i saj, 31- vjeçari Xhafer Mata, i cili më pas vrau veten. Në lidhje me këtë ngjarje e cila mori një bujë shumë të madhe, ka folur së fundmi edhe babai i Xhafer Matës për “GSH.al”.
Tragjedia e 8 qershorit, në rrugën “Don Bosko”, në kryeqytet, me kalimin e ditëve po zbehet nga kujtesa e njerëzve, por jo nga e familjarëve. Babai i autorit të ngjarjes, kërkon falje nga familja e Xhuljeta Çunit. Familja e kësaj të fundit, ende nuk i kanë kthyer një përgjigje.
Autori i krimit të dyfishtë, ka qenë i divorcuar nga bashkëshortja e vet, e cila po ashtu ka moshën e viktimës Çuni. Xhaferr Mata, duhet theksuar se ka qenë 31 vjeç. Madje nga martesa e tij ai kishte edhe një djalë. Krimi i kryer për arsye pasioni, ka tronditur opinionin publik shqiptar. Por në një intervistë për “Gazetën Shqiptare”, i ati i autorit ka nxjerrë detaje të reja në dritë.
Babai i Xhafer Matës: “Ata ishin të lidhur, Xhuljeta vetë më ka thënë në kafe që e donte …

Çështja nëse Xhaferi dhe Xhuljeta ishin vërtet të lidhur është diskutuar shumë dhe vet babai i tij ka folur mbi këtë çështje. Ai ka rrëfyer se nga informacionet që ai di mbi këtë ngjarje, djali i tij, Xhafer Mata, ka qenë në një marrëdhënie romantike me vajzën 19-vjeçare.
“Doja të bindesha vetë fillimisht se një gjë e tillë ishte e vërtetë. Pas shumë përpjekjesh, djali e pranoi që kishte një lidhje dhe se kishte vendosur të martohej me të”, kanë qenë fjalët e babait të Xhaferit, i cili u shpreh se djali i tij e kishte pranuar lidhjen me Xhuljetën pasi komshinjtë i kishin parë bashkë.
Po ashtu, babai i Xhafer Matës ka shtuar se ai e ka takuar Xhuljetën në një lokal, ku kjo e fundit ka pranuar se e donte Xhaferin, por nuk ka dashur t’i tregojë familjes për lidhjen me të.
“Po. I kërkova dhe u takuam. E morëm në makinë. Isha unë bashkë me gruan, Xhaferri dhe djali i vogël. Shkuam në një lokal tek “Fusha e Aviacionit”. Aty bisedova për herë të parë më Xhuljetën. Edhe i fola pak. I thashë si ka mundësi që një vajzë se ti, me gjithë të mirat, është lidhur me djalin tim që ka edhe fëmijë.
Më tha e dua Xhaferrin. I kërkova atëherë të shkonte e t’i tregonte familjes së saj. Hezitoi dhe kjo s’më pëlqeu shumë”, ka thënë ai.
Ndërkohë, zoti.Mata u shpreh se ai po pret pajtimin me familjen e Xhuljetës, pasi ka dërguar edhe njerëz atje që t’i kërkojnë falje në emër të tij. Ai ende nuk ka marrë një përgjigje.
“Kam shtrirë dorën e pajtimit. U kam çuar në shtëpi dajën e Xhafës e një kushëri timin për t’u kërkuar ta ndajmë dhimbjen bashkë. Nuk kemi ende një përgjigje prej tyre. Nëse pranojnë të takohemi, faljen do t’ua kërkoj i ulur në bisedë”, u shpreh ai.
Për lajm-shqip:
Jorida Fataj
16.06.2018