Rrjeti publik gjerman, ARD, ka përgatitur një seri kronikash nga Shqipëria në këtë ditë zgjedhjesh.
Gazetarja Karla Engelhard sjell edhe një foto nga Shqipëria, duke treguar kontrastet e këtij vendi.
Pasi merret me deklaratat zgjedhore të Berishës dhe Ramës, gazetarja interviston analistin Afrim Krasniqi.
“Edhe nëse askush nuk po flet për krizën ekonomike, ajo po vjen. Nuk e përjashtoj që në shtator Shqipëria të falimentojë,” thotë ai.
Gazetarja gjermane shkruan se papunësia në vend është e lartë dhe fuqia ekonomike e ulët. Ajo shton se këtu gjithkush tregton diçka.
“Por familje të tëra janë në varësi të punëve në administratë. Në zgjedhje vendoset edhe se kush do i marrë 80 mijë vendet e punës në administratë,” thekson ajo.
“Tradicionalisht pjesëmarrja në zgjedhje në Shqipëri është e lartë. Por ka një problem: zyrtarisht ka vetëm 2.8 milion banorë, ndërkohë që janë 3.2 milion votues. Arsyeja është sepse shumë shqiptarë jetojnë jashtë vendit. Ata janë regjistruar dhe mund të votojnë, por vetëm në Shqipëri.
Partitë ofrojnë udhëtime falas me avion ose autobus, por kjo nuk do thotë se ata janë altruistë. Me celular ata duhet të fotografojnë foton e tyre, për ta dokumentuar, raportojnë mediat shqiptare.
Në fshatra, blerja e votave me frigoriferë dhe lopë nuk është ndonjë gjë e re. Por ka edhe përparime. “Zgjedhjet janë bërë më transparente, disa gjëra dalin në publik,” thotë politologu Afrim Krasniqi. Duke iu referuar Bashkimit Europian, ai shton: “Brukseli kërkon nga ne stabilitet, në vend të një demokracie që funksionon mirë. Por ne kemi probleme me të dyja”. Dhe kjo do mbetet edhe për një kohë kështu,” shkruan gazetarja.
23.06.2013
Burimi: Gazeta Tema
