Alexander Arvizu studentëve: Vendosni vetë për votën tuaj !
Ambasadori amerikan, Aleksandër Arvizu dhe ambasadori i BE, Ettore Sequi zhvilluan pasditen e sotme një bashkëbisedim me studentë të ekselencës së Universitetit të Tiranës në sallën ‘Iliria” në Qytetin Studenti.
Ambasadori Arvizu u bëri thirrje studentëve të marrin pjesë në votime pasi sipas tij pjesëmarrja në votime e çdo të riu është e një rëndësie të madhe, pasi vetëm kështu politikanët do të bëhen më të përgjegjshëm ndaj tyre.
Sipas ambasadorit amerikan, të rinjtë nuk duhet të jenë indiferentë ndaj votimit, pasi ka raste kur një votë e vetme bëhet vendimtare.
“Zëri juaj vota juaj, vota juaj është zëri juaj. Ju mund të thoni thjesht jam një votues dhe nëse votoj nuk ka rëndësi. Sigurisht që ka rëndësi, pasi ka raste kur një votë e vetme ka shumë rëndësi. Në New Hamshur në 1974 është ndarë vendi me dy vota. Dimë dhe rastin e Shqipërisë me 10 vota. Florida në vitin 2000 ka pasur ndryshim me 500 vota”, shtoi Arvizu.
Arvizu u bëri apel të rinjve që të mos i lejojnë partive që të marrin votën e tyre të mirëqenë, ashtu sikurse të mos ndikohen nga besnikëria e familjes së tyre, ndaj një partie duke shmangur votimin familjar.
“Pjesëmarrja duhet të jetë sa më e gjerë. Ndërsa Shqipëria vijon para me evolucionin demokratik, ky është një element që ka nevojë për më shumë punë. Nuk po flas vetëm për të dalë në votime dhe për të votuar. Këtu është tejet e rëndësishme është që vota juaj të mos merret e mirëqenë. Ju duhet te vendosni vetë për kë do votoni, pavarësisht për kë voton familja juaj”, tha Arvizu.
Ndërkohë, ambasadori i BE, Sequi theksoi se procesi i integrimit nuk ka përfunduar me miratimin e 3 ligjeve të integrimit dhe u bëri thirrje të rinjve që të bëhen pjesë e debatit. Sipas tij përgjegjësia e secilit nuk duhet të përfundojë tek hedhja e votës
“Qëndroni gjithmonë të interesuar për problemet, Qëndroni gjithmonë të interesuar për demokracinë dhe të ardhmen e vendit tuaj. Tre ligjet e famshme, nuk shënojnë fundin e procesit të integrimit, duhet të shprehni interesin tuaj. Bëhuni pjesë e debatit”, tha Sequi.
03.06.2013
Burimi: Shekulli.com
