Pas një seance maratonë, drafti i opozitës për vetting në politikë u rrëzua me 74 vota kundër, ndërsa 52 votat e opozitës kanë shkuar pro nismës për amendamentet kushtetuese.
Kreu i PD, Lulzim Basha, nga foltorja e Kuvendit akuzoi mazhorancën se nuk e do vetingun në politike. Por në kushtet, kur mazhoranca i rrëzoi nismën opozitës për vetting në politikë, Basha i shtriu dorën e bashkëpunimi Ramës.
“Ju nuk e doni vetingun sepse për shumë do sillte fundin e karrierës politike, por nga ana tjetër do ishte çlirimi i këtij Parlamenti dhe Shqipërisë nga krimi. Apeli është të bashkoheni me ne që të votojmë amendamentet kushtetuese, por ligjet bëjini vetë dhe ne do të votojmë me një kusht që propozimet tuaja të jenë konsultuar me Komisionin e Venecias”, nënvizoi Basha.
PS paralajmëron tërmet nga SPAK
Ne lidhje me keto akuza ka reaguar kreu i grupit parlamentar të PS, Taulant Balla. Deputeti socialist i kujtoi kryedemokratit që vetingun politikës do t’ia bëjë SPAK dhe BKH. Balla theksoi se KLP shumë shpejt do të hapë garën për prokurorin special.
“Jemi të gatshëm të votojmë sëbashku reformën zgjedhore si reforma kyçe që kemi përpara dhe që lidhet edhe me vetingun në politikë, sepse vetingu në politikë ka vetëm dy institucione: Zgjedhjet dhe drejtësia e re.
Nuk ka politikan të korruptuar që mund të ikë. Ne jemi gati edhe për këtë vetingun siç e thua ti me libër shtëpie, por të marrë fund njëherë e përgjithmonë kjo shterpësi e impotencës tënde politike”, deklaroi Balla.
Meta rreshtohet krah opozitës
Rrëzimin e nismës së opozitës për veting në politikë nga ana mazhorancës, dje e ka komentuar edhe Presidenti Ilir Meta.
Nga Pogradeci, Meta është rreshtuar krah opozitës, duke deklaruar se vetingu në politikë është i domosdoshëm dhe se duhet gjetur mënyra për realizmin e tij – raporton gazeta Sot.
“Mesazhi është që reforma në drejtësi duhet bërë seriozisht. Kushtetuta duhet respektuar seriozisht. Dhe vetingu është i domosdoshëm dhe duhet gjetur mënyra për realizimin e tij që të kemi një ndarje të qartë të politikës nga aktivitetet kriminale”, deklaroi kreu shtetit.
Erjona Keta
22.12.2018
