Sapo keni hyrë në një lidhje, e papritur po afrohet Shën Valentini.
Çfarë duhet të bëni? Një gjest të madh romantik apo të fshiheni e ta injoroni?
Vallë partneri juaj i ri dëshiron të festojë me ju, apo i ka ardhur në majë të hundës me festën e të dashuruarve në lidhjet e mëparshme?
Jeni të dyjëzuar dhe kjo është fare normale, por nëse e keni kaluar fazën e bisedës “çfarë jemi ne”, e keni vendosur se jeni në një lidhje, mund të bëni një gjest të vogël romantik.
Pra, as ta injoroni e as të dhuroni yje, por mbajini gjërat në një nivel të mesëm. Nëse nuk jeni të sigurtë se çdo të thotë nivel i mesëm, atëherë ndiqni këto hapa:
Vendosni çfarë kuptimi ka Shën Valentini për ju
Merrni njëherë kohë për vete që ta kuptoni se çfarë do të thotë Shën Valentini për ju.
Nëse jeni romantik, atëherë është mundësia perfekte për t’i treguar partnerit sa e vlerësoni.
Nëse lulet, muzika, qirinjtë nuk janë në tipin tuaj, nuk keni pse të ndiheni keq aspak. Sido të vendosni, mos e lini energjinë e Shën Valentinit t’ju gënjejë se është një hap i rëndësishëm në lidhjen tuaj.
Flisni me njëri – tjetrin
Pasi ta keni vendosur çfarë kuptimi merr për ju festa e të dashuruarve, flisni me partnerin.
Tashmë jeni në një lidhje dhe duhet të merrni parasysh edhe dëshirat e tjetrit.
Surprizat janë të bukura, por është e mira të lihen për vitet pasardhëse kur lidhja juaj të jetë më e gjatë dhe më e konsoliduar.
Nëse bëni një gjest të madh romantik që partneri juaj nuk e pret, mund ta frikësoni atë.
Nga ana tjetër nëse pritshmëria është pikërisht një gjest i madh romantik, duhet të përshtateni. Duke qenë se është vetëm fillimi dhe nuk duhet të pretendoni se ja lexoni me saktësi mendjen partnerit, atëherë gjëja e duhur është të flisni dhe të arrini në një kompromis.
Niseni bisedën kështu: “E di që sapo jemi lidhur, por kam shumë dëshirë ta festoj Shën Valentinin dhe desha të flisnim se ç’do të bëjmë atë ditë,” ose “Po afron Shën Valentini dhe në fakt unë nuk e kam festuar, por dua të di nëse është e rëndësishme për ty”.
Mund të jetë e sikletshme në fillim, por do të shmangë të gjitha pritshmëritë dhe zhgënjimet.
Mos bëni gjëra të mëdha
Edhe nëse bini dakort për ta festuar, mos bëni gjëra të mëdha.
Zëvendësojeni darkën romantike të shtrenjtë dhe dhuratat e shtrenjta për një gjë më të thjeshtë sepse e para, mund të frikësoni partnerin dhe e dyta, mund ta vini partnerin tuaj në siklet sepse dhurata që ju ka bërë mund të mos jetë në lartësinë e asaj tuajës.
Po afron Shën Valentini. Ja si duhet të sillen ata që janë në një lidhje…
Tregohuni të kujdesshëm, jo gjenerik
Është shumë e thjeshtë të biesh në kurthin e mendimeve se si duhet të jetë dita e Shën Valentinit.
Ju ende nuk e njihni mirë njëri-tjetrin dhe nuk e dini nëse zgjedhja e duhur do të ishin lule e çokollata apo diçka tjetër.
Sërish, biseda është çelësi për të shmangur çdo keqkuptim, por mund edhe të fokusoheni në gjërat që dini me siguri për partnerin dhe të mendoni diçka që lidhet me to.
Punojeni vetë dhuratën tuaj
Nëse partneri juaj nuk është materialist, atëherë asgjë nuk do ta bënte më të lumtur se një kartolinë që e keni pikturuar vetë apo një objekt, bizhuteri që nuk është e shtrenjtë, por ka kuptim për të dy ju.
Tregohuni realist
Ekziston tendenca se sjellja e partnerit për Shën Valentin është tregues dashurie.
Nga ana tjetër, arsyeja pse zhgënjehemi janë pritshmëritë.
Është një kurth i rrezikshëm, sidomos për lidhjet e reja kur partnerët ende nuk janë të sigurtë nëse i/e zgjedhuri/a tyre i do.
Ulni pritshmëritë.
Sapo jeni lidhur dhe nuk mund të prisni asgjë ekstravagante.
Nuk e dini ende nëse lidhja juaj do të mbijetojë deri në festën e rradhës.
Gjithashtu, nuk keni pse zhgënjeheni nga dhurata sepse duhet gjithmonë marrë parasysh mundësia financiare.
Ndoshta partneri juaj, edhe pse i ri, do të kishte dëshirë t’ju dhurojë botën, por nuk mundet.
Mos u ndjeni të detyruar të thoni “Të Dua”
Ka shumë emocion dhe energji dita e të dashuruarve, sidomos nëse jeni ende në fazën e muajit të mjaltit dhe partneri juaj ju duket qenia më perfekte që ecën mbi tokë.
Nuk duhet të mashtroheni nga situata dhe të thoni “Të Dua” nëse nuk e ndjeni.
Duke qenë në fillim, gjasat janë që nuk e keni kaluar ende zënkën e parë, një situatë stresuese apo nuk keni parë ende anën e keqe të partnerit tuaj.
Le ta pranojmë, askush nuk është perfekt.
Prandaj mos u ndjeni të detyruar të zotoheni për dashuri nëse nuk jeni gati.
Pasi ta keni njohur partnerin edhe në të keq e sërish ndjeni dashuri, atëherë thuajeni.
07.02.2018
