E pabesueshme. Një njeri ka bashkëjetuar për 35 vjet me plumb në trupin e tij. As vet nuk e ka besuar se në trupin e tij mbante “të fshehur” plumbin që del nga gëzhoja e një fisheku.
Një 60 vjeçar nga Librazhdi ka jetuar 35 vjet me plumb në trup.
3 dekada e gjysëm që ankohej për dhimbjen në shpatull, dhe askush nuk e shëroi. Nuk la mjekë e “plakë” dhe “derman” nuk gjeti. Ngjarja e trishtë ka një retrospektivë të largët. Ishte 20 vjeç atëherë, kur kryente shërbimin e detyrueshëm ushtarak. Një histori që të jep mornica në trup ajo e Iliaz Dashit nga fshati Rrajcë i Prrenjasit. Ka qenë një natë e ftohtë Janari kur diçka e nxehtë i kishte përshkuar shpatullën. Për një moment ka ndjerë dhimbje të lehtë dhe më pas në gjendje të fikti. Mjeku i repartit do t’i jepte ndihmën e parë. Më pas do ta përcillte duke i thënë se skishte asgjë të rëndësishme. “Ndoshta me bajontë ke gërvishtur padashje trupin”- i kishte thënë mjeku duke e përcjellë. Edhe në spitalin e Librazhdit nuk e kishin pikasur plumbin qorr që i kishte hyrë në trup.
Madje, do ta akuzonin se i shmangej shërbimit ushtarak. 30 vjet e sorollatën nëpër spitale me një dhimbje që askush nuk e gjente origjinën. Vonë, shumë vonë mjeku i fshatit i ka rekomanduar të bënte një grafi. Vetëm grafia e nxorri se kishte një plumb në shpatullën e djathë. S’kish ku të shkonte tjetër, veçse në spitalin ushtarak të Tiranës. Ata mundën t’ja nxjerrin këtë trup të huaj nga trupi i tij. Tashmë ankthi dhe dhimbja 35 vjeçare i ka mbetur të shkuarës. Jeton dhe punon si gjithë të tjerët.
Për Lajm-Shqip
Alfrida Danushi
