TIRANE – Dua mbrojtje nga shteti”. Teksa e dëgjon këtë fjali, duket si diçka normale, por në të vërtetë është vetëm fillimi i një historie të dhimbshme njerëzore. Është historia e Xhemal Xhepmetajt, i cili kërkon mbrojtje nga djali i tij. Me sytë në lot dhe buzët që i dridhen, 46-vjeçari tregon për “Gazetën Shqiptare” konfliktet që ka me djalin e tij 20-vjeçar. “Ka tre vjet kjo histori, por punët kanë shkuar aq keq saqë u detyrova të kërkoj mbrojtje nga djali im”, – pohon Xhepmetaj. Ai nuk e ka aspak të lehtë që të flasë kundra djalit të tij, por “edhe shpirti nuk duroi më, edhe zemra u ça më dysh”, – rrëfen ai. Kur e pyet nëse ai ndonjë ditë do e falë djalin e tij për t’u rikthyer sërish në familje, 46-vjeçari, pasi mendohet disa momente, me mjekrën që i dridhet thotë: “Jo, nuk e fal”, ndërsa zemra e tij duket se thotë të kundërtën, sepse lotët nuk i reshtin teksa e thotë këtë gjë.
Z.Xhemal, prej sa kohësh keni konflikte me djalin tuaj?
Nuk është aspak e lehtë që unë të flas për djalin tim. Konfliktet mes nesh kanë lindur që kur ai ka qenë 17 vjeç, se tani është 20 vjeç. E regjistrova në shkollë të mesme, nuk donte të shkonte dhe një ditë më tha “mos më shqetëso, mos më bezdis, dua të bëj jetën time”. I gjeta edhe punë, nuk donte të punonte. U mundova disa herë që t’i flas, ta pyesja se çfarë kishte, pse papritur kishte ndërruar sjellje, por ai më tha “më lër të qetë”. Por, situata sa vinte dhe përkeqësohej çdo ditë dhe më tepër. Filloi të vinte në shtëpi vonë, nisi të konfliktohej me ne, derisa një ditë më kërkoi lekë dhe kur unë i thashë që nuk kam, më kërcënoi. Kështu nisën kërcënimet ndaj nesh, të cilat vazhdojnë edhe sot.
Ju po thoni që djali juaj ju ka kërcënuar apo që ju ka dhunuar?
Unë nuk e dija me çfarë merrej ai, sepse të sillet njeriu në atë mënyrë të çuditshme, patjetër që duhet të merret me gjëra të këqija. Një darkë ai erdhi vonë në shtëpi dhe më kërkoi lekë. Unë nuk i dhashë, atëherë ai nxori thikën dhe më kanosi. Kjo ishte hera e parë që ai ngriti dorën kundra meje. Por, ai e bëri rrugë këtë gjë. Mua nuk ka arritur të më godasë, se nuk më mund dot, por më ka kërcënuar me çfarë ka pasur, me thikë, me hekura. Por, ai ka rrahur nënën e tij, dy vajzat e mia, të cilat janë bërë me probleme psikologjike. Djali im na ka shkatërruar si familje. Një ditë i thashë: “Në rregull, do që të bësh jetën tënde? Urdhëro çelësat e shtëpisë, sepse unë po iki”, (unë banoja në Durrës). Erdha në Tiranë, ku jetoj me qira.
Juve, keni marrë urdhër mbrojtjeje nga gjykata?
Pasi erdha në Tiranë, djali na la të qetë për disa kohë. Por, kjo zgjati vetëm sa ai shiti gjithçka brenda shtëpisë; edhe dyert i shiti, edhe dritaret, dhe kur iu mbaruan lekët, para tre muajsh erdhi në Tiranë. Unë u mundova që ta pranoja në shtëpi, edhe ai pranoi dhe tha se do të ndryshonte. Por kjo zgjati vetëm tri ditë, sepse ai pas tri ditësh më kërkoi sërish lekë dhe nisi dhunën ndaj nesh. Jam munduar disa herë që të ulem dhe të flas me të, por marrëveshjet tona zgjasin vetëm tri ditë dhe më pas ai nis çdo gjë nga fillimi. Në këtë kohë kam marrë edhe një urdhër-mbrojtjeje, që ai nuk e ka respektuar. Unë nuk kam se ç’të bëj më, nuk di më se çfarë të bëj, sepse kam hallin e gruas dhe vajzave, sepse ai kthehet dhe ushtron dhunë ndaj atyre. Do thuash ti se si flas unë kështu, por zemra është çarë, shpirti nuk duron më. Unë dua mbrojtje nga shteti.
Do e falnit djalin tuaj nëse një ditë rikthehej?
(Qan). Nuk e fal, vetëm Zoti e di se çfarë ka bërë ai. Edhe sikur të lyp rrugës dhe ai të kthehet një ditë me para që të më kërkojë falje, unë nuk e fal më atë.
02.05.2013
Burimi: Balkanweb
