Gjykata e Rrethit të Beratit, vendosi të quajë të ligjshëm arrestimin e Admir Duro dhe vendosi ndaj tij masën e “arrestit me burg”. Në emër të organit të akuzës, Olgert Rumnici, i kërkoi gjykatës cilësimin si të ligjshëm të arrestimit të 42-vjeçarit dhe caktimin e masës së sigurisë “arrest me burg”. Ndërsa pala mbrojtëse kërkoi cilësimin e arrestimit si të paligjshëm dhe caktimin e një mase më të lehtë sigurie për shkak të gjendjes së tij të rëndë të shëndetit mendor. Gjendja e tij nuk është marrë parasysh nga kryetari i trupit gjykues, Durim Hasa.
42-vjeçari mori peng djalin, lëndoi dhe dy policë, ja masa e gjykatës Berat …
Burri mësohet se tre ditët e fundit kërcënonte me jetë djalin e tij, duke e mbajtur të izoluar brenda dhe për këtë është njoftuar policia.
Menjëherë, policia dhe forca të zjarrfikëses, kanë shkuar në apartamentin ku jetonte burri dhe kanë arritur të nxjerrin djalin. Fëmija mësohet se ka qenë i frikësuar dhe ndaj tij është ushtruar dhunë psikologjike.
Burri qëlloi me tjegulla nga kati i dytë i banesës, ndërsa kërcënoi policinë, duke u hedhur copa tjegullash. Burri mësohet se ishte në gjendje depresive. Divorci me bashkëshorten vite më parë, papunësia dhe pamundësia ekonomike, janë shkaqet për gjendjen e rënduar të tij.
Dhe në sallën e gjyqit Duro ka shfaqur probleme me shëndetin mendor, por për shkak të mos kryerjes së vizitave mjekësore nuk ka pasur prova për t’u paraqitur në gjykatë që dëshmojnë problemet e tij mendore. 42-vjeçari akuzohet tashmë për veprat penale, “Heqja e paligjshme e lirisë”, “Dhuna në familje”, “Kundërshtimi me dhunë i punonjësit të policisë” dhe “Prishja e rendit dhe qetësisë publike”.
Pas arrestimit ai qëndroi në spitalin e Beratit. Ndërsa sot është përballur me gjykatën.
Për lajm-shqip:
Jorida Fataj
26.06.2018