Në raportin e Komisionit të Etikës dhe Disiplinës të UEFA -s, përmendet dhe emri i ish-ministrit te Financave, Ridvan Bode. Në raportin prej 93 faqesh, Bode akuzohet se ka kërcënuar disa trajnerë ekipesh, duke u kërkuar të humbasin ndeshjen,
Sipas UEFA, Bode, është ideatori kryesor për ‘kërcënimin’ e inspektorëve.
Akuzat e rënda nuk janë ngritur vetëm ndaj tij dhe skuadrës së Skënderbeut, por dhe për presidentin aktual, Ardjan Takaj, apo dhe ish-presidentin Agim Zeqo. Gjithashtu, nuk kanë mbetur jashtë dhe një numër i madh lojtarësh, trajnerësh e personazhe të tjera të sportit dhe biznesit në Shqipëri.
Pyetur nga BIRN, Ridvan Bode, i cili ka drejtuar Ministrinë e Financave në vitin 1996 si dhe në vitet 2005-2013, i hodhi poshtë akuzat, kur tha se:
“Janë të njëjtat thashetheme të dy viteve më parë. Këtë qëndrim publik e kam mbajtur atëherë”.
Raporti shkruan se, Bode është pjesë integrale e skemës së manipulimit të ndeshjeve të Skënderbeut
Megjithatë, ja ç’farë thuhej në raport për Boden.
“ Raportohet se, Ridvan Bode ka gjithashtu marrëdhënie të ngushta me klube të tjera në Shqipëri. Ai është mik i mirë , me donatorin kryesor të KS Shkumbinit, Dashnor Sula. Që të dy janë anëtarë të Partisë Demokratike”. “Kjo, nuk është surprizë pasi BFDS ka survejuar shumë ndeshje të Skënderbeut. Me një shkallë të lartë dyshimesh për manipulim, ku përfshihen klube që kanë qenë ose nën presion nga z. Bode, si klubet Dinamo e Tirana. Ose ato të kontrolluara nga miqtë dhe kolegët e tij, si KS Shkumbini etj.. Kjo, bashkë me perceptimin tashmë famëkeq publik si fiksues ndeshjesh, provon se ai është pjesë integrale e skemës së Skënderbeut,” vijon më tej raporti.
Por, Ish-ministri demokrat i Financave i ka mohuar akuzat në mënyrë të prerë, kur tha se:
“Nuk kam qenë asnjëherë financues, donator apo anëtar bordi në asnjë organizim shoqëror, kulturor apo sportiv në Shqipëri apo jashtë saj,”.
Bode akuzohet gjithashtu se ka kërcënuar ish-trajnerin Dinamos Luis Manuel Blanco gjatë një ndeshjeje me Skënderbeun, në vitin 2011. Blanco ka dëshmuar para inspektorëve duke thënë se Bode i është drejtuar atij me këto fjalë:
“Nëse ti na prish pushimet, unë do të të shkatërroj. Ai më kërkoi kur u ktheva për pjesën e dytë, skuadra jonë duhej të humbte. Unë nuk i besoja syve. Ishte e tmerrshme.”
Por dhe këto akuza, Bode i ka mohuar, kur tha se: “Kurrë nuk jam takuar apo biseduar për ndeshje apo rezultate me presidentë, trajnerë apo lojtarë të asnjë ekipi futbolli,” tha ai.
www.lajm-shqip.com
